قصيدة الفراعنة

ناقتي ياناقتي لا ربـــاع ولا ســـــديس ... وصليني لابتي من وراء هاك الطعوس
حايلاً رابع سنه من خيار العيس عيــس ... خفها لا درهمت كنه بالنار محسوس
في دجى خالي خلا لاحسيس ولانسيـس ... تنوخذ من شدة البرد طقطقة الظروس
في عيوني يكفخ الطير ويطيح الفــــريس ... وانتهض جساس من دون خالته البسوس
وفي خقوقي فرخ جنيتاً يضرس ضريـــس ... يوم اوردها هجوس واصدرها هجوس
ديرتي دار ابن ضاري وابن غثلم جريـس ... ديرة اللي دوجوا في فيافي نجد جوس
ديرتي يابنت شيخاً ومعدنها نفيــــــس ... عيطموساً دونها دثرتني عيطموس
جادلاً مطرق جسدها مع الغربي يميــس ... طينتاً من تربة الخلد والدم محموس
نقشت خمساً من الخمس في يوم الخميس ... ليت شعري ما ارادت بهذا دختنوس
كم تمنا ان معه مثـــلها فتـــنة بلـــــيس ... كان يمكن قد قلب نصف امتنا مجوس
كن دمـــاث الصدر منها كنيسة او كنيس ... صومعة رهبان ديراً يؤدون الطقوس
أتقــــوس مع تقـــوس نواهــدها وأقييس ... قبتين قاب قوسين قوساً جنب قوس
خصرها يحكي لنا واقع القوم التعـــــيس ... وردفها عن غطرسة بوش يعطينا دروس
وبالرغم من قصرها مايجالسها جليـــــس ... تصبح اطول نسوة الارض في وضع الجلوس
العروسه ماتبي غير ابو تركــي عــــريس ... العروسه نجد ماهيب حي الله عروس
نجد بنت المجد وإنسة مونـــسة الونيس ... ما عسفها الا معزي ضحى اليوم العبوس
كل اهل نجد هلي من اجا حتـى الخميس ... في ذراهم بالتجي عن مجففة الرسوس
وعيشتي مابين اسوداً ولو مـــــاني رئيس ... خير من كوني رئيساً على شلقة تيوس
وليس عيباً ان خدعني بمكــــره كل هيس ... لان ما يفهم بمكر الهيوس الا الهيوس
مصطفى في مأدبة عــمه البـــــابا لـــويس ... كبر اللقمه تحت ضوء حمراء الكؤوس
وطسم حدتها علـــى حائط المبكى جديس ... يوم شقت ثوبها بنت عفارٍ شموس
سيدة هاك القـــــصر اسمها الاول لميــس ... دونها سمر الحناجر بترها حد موس
قسقسة لاحرارهم قيس قيس قيس قيـــس ... والبستهم من مهانتهم انواع اللبوس
بين خدعة كعب اخيلاً ومولد ادونـــــيس ... درسونا الالهه والمدرس هنا روس
وش لقو من قناة السويس اهل الســــويس ... وش لقو من تلمسان قوماً من سنوس
كلهم من شدة الجوع راحوا خنــــــدريس ... بين غيبوبة مخدر وصحوة عرق سوس
ثورة راحو سببتـــها بتـــوع الاتـــوبيس ... وش نبي فيها وهي ماتهز الا الغروس
آفة المرء اثنتــــــان إلف كاس وحب كيس ... والنفوس إليا بغيت اتعرفها ارمي الفلوس
ينكشف زيف الشعارات الا حمي الوطيس ... ترجع الاذناب أذناب وتبقى الروس روس
صدق لاقال العـرب مايحوس الا الخسيس ... ولا يويط الروس شيئ مثل ضعف النفوس
ناقتي ياناقتـــــــي لا ربـــاع ولا ســديس ... وصليني لابتي من وراء هاك الطعوس